ساكت ياوطن والحركَه تاكل بيك

[كبرياء وطن]

ساكت ياوطن والحركَه تاكل بيك
,,,



ساكت ياوطن والحركَه تاكل بيك
لو خايف أظن والسكته من خوفك


من حرب الحرب جبنه العمر وياك
من اكل الجثث ما ينترس جوفك


مابيك الذنب كَول الذنب چا وين
يمكن نعتذر لو نفهم ظروفك


چنت المدرسه وبيك الشعب طلاب
وبس دك الجرس شو فارغه صفوفك


تقبل ياوطن يرضيك هذا الحال
ناسك للأسف تتراكض تعوفك


وتقبل ياوطن شبانك الحلوين
تتغرب غصب تحرمهه من شوفك

تقبل ياوطن يرضيك هذا الحال
ناسك للأسف تتراكض تعوفك


جاوب لا تظل ساكت يبو الثورات
عشرينك أمس اتعيش بطيوفك


من طور الحزن ملينه ما مليت
چاطور الفرح ما تعزف دفوفك


من ريد الفرح بس كون ريدك سيف
موعيب بغمد اتنام اسيوفك


بايكَ ما صرت ما خاف من جلاد
مو هذا شعارك هذا معزوفك


چاشنهو التغير يا عراق شبيك
مو چانت دول ما تنطق حروفك


نعتب ياوطن من حبنه الك والله
شفناكم نهر عطشانه جروفك


ومن نصحك لأن صدكَنه كلنه اخطاء
يا بيت الكرم نبقه احنه ضيوفك


أصفن ويه نفسك راح تعرف زين
لو ما تنتفض چاضاع معروفك

عذراً يا وطن بس ثور حتى نثور
لو تكَضي العمر بالقيد چفوفك
*****
راق لي فنقلته
اختكم
كبرياء وطن

[بصراوي مشاغب]

كلمات رائعة وجميلة

وربي يحمي الوطن من شر الاشرار

[مجيد السيد]

شكرا لك لنقل القصيدة الرائعة

تقبلي تحياتي

[كبرياء وطن]

شكراً لتعطيركما الموضوع
دمتما بخير لا ينتهي ابداً
تحيتي العطرة

[عراقي وبس]

الوطن مسكت الوطن صابر
على مايفعل من يدبوا عليه
وسيصبر
حتى يبان الحق
من الباطل
شكرا الك للطرح

[حسوني]

اه ياعراق كم انت مظلوم
شكرا ع المجهود

[قاسم البهادلي]

وطني وحقك مابكيت على احد
الا لآجلك تبكي العين دما

كبرياء وطن اختيارك رغم لوعته راق
ورغم حزن القوافي فالعراق عراق

دمت بالف خير

[كبرياء وطن]

وطني وحقك مابكبت على احد
الا لآجلك تبكي العين دما

كبرياء وطن اختيارك رغم لوعته راق
ورغم حزن القوافي فالعراق عراق

دمت بالف خير



و انا قد راق لي حضورك الانيق سيدي الكريم
شكراً من الاعماق
دمت بسعادة لا تنفذ
تحياتي