اسئلة للمغتربين

[قائد بغداد]

1-شنو شعورك اول مخرجت من العراق
2-اول موصلت للبلد الجديد اشكان شعورك
3-بعد ما تغربت شنو رائيك بلغربه
4-تتمنى ترجع للعراق
5- شنو اول منطقه اتحب اتروحلها من ترجع
6-اريد كم كلمه تعبر شعورك بلغربه
7-اريد دعاء للعراق
ياله انتضر ردودكم الحلوى

[مـلاك الـرحمـه]

اولا الله محيي اصلك
1-شنو شعورك اول مخرجت من العراق
احتصار في القلب + خوف من المجهول
2-اول موصلت للبلد الجديد اشكان شعورك
بدأت نبضات الغربه تدق في صدري
3-بعد ما تغربت شنو رائيك بالغربه
لااريد ان اكون متبطره بحالي فانا اعيش حياة رغيده مع زوجي واطفالي والحمد لله
لكن تبقى الغربه مره وفراق الاهل والاخوان اصعب بكثير من اي شيء اخر
4-تتمنى ترجع للعراق
اووووف اكييييد اكثر من اي وقت مضى
5- شنو اول منطقه اتحب اتروحلها من ترجع
نجف وكربلا لانه ماشبعت منهم
6-اريد كم كلمه تعبر شعورك بالغربه
تعبانه نفسياً من الغربه اريد ارجع بس صعب
صعب على الانسان ان يحس نفسه انه غريب طول عمره في بلد ماينتمي الا لا من دين ولا من اسس ولا من مفاهيم اجتماعيه ولاتقاليد
7-اريد دعاء للعراق
الله يحمك ياعراق وتبقى النا رفعت راااااااس ياتاج على الراس

/images/icons/4.gif شكرا قائد دائما /images/icons/w.gif

[أرض الرافدين]

1-شنو شعورك اول مخرجت من العراق

خرجت من العارق فقط بجسدي ولاكن قلبي في العراق

2-اول موصلت للبلد الجديد اشكان شعورك

الصراحة اول مانزلت من السيارة فكرت ارجع والله

3-بعد ما تغربت شنو رائيك بلغربه

ضياع جسد ولا روح

4-تتمنى ترجع للعراق

نعم ان شاء الله ولاكن اريد ارجع للعراق من حيث افيد
العراق واستطيع مساعدة الشعب العراقي

5- شنو اول منطقه اتحب اتروحلها من ترجع

الصراحة هواية اماكن بس اول مكان سوق الغزل

6-اريد كم كلمه تعبر شعورك بلغربه

وحشة والغربة ضياع وعدم استقرار

7-اريد دعاء للعراق
اللهم احفظ العراق بكافة مكوناته وطوائفه وكفيه شر
الحاقدين يارب العالمين بحق محمد واله اجمعين يارب العالمين

تحياتي لك اخي العزيز على الموضوع الجميل وبارك الله بيك

[قائد بغداد]

شكرا ملاك
شكلا حبيبي اض الرافدين
يارب اترجعون سالمين غانمين
ان شاء الله

[نجمة البصرة]

1-شنو شعورك اول مخرجت من العراق
شعور جزين وماينوصف والله بس دموعي تصب
2-اول موصلت للبلد الجديد اشكان شعورك
كنت حاسة بالوحده وبالضياااع
3-بعد ما تغربت شنو رائيك بلغربه
عذاب موت بطيء
4-تتمنى ترجع للعراق
اي اكيد وخصوصا بعد مارحت زياره وشفت الوضع بعيني
صح مو كلش زين بس الحمدلله وان شاء الله يصير احسن ونرجع
5- شنو اول منطقه اتحب اتروحلها من ترجع
اكيد منطقتي وكربلاء والنجف
6-اريد كم كلمه تعبر شعورك بلغربه
والله شعوري حاليا هو وحدة وحزن كآآآبة
7-اريد دعاء للعراق
الله يحفظ العراق من شماله لجنوبة ويوحد كلمة ناسة
ويرفع عنه ايدي الارهاب الي تسعه لتخريبة


اخويه قائد تسلم على الموضوع
وياربي ماتعيش الغربة عن بلدك واهلك وناسك


تحياتي الك

[قائد بغداد]

شكرا نجمه ويارب ترجعون سالمين غانمين للعراق
تحياتي الج ومنوره

[ام فاطمة العراقية]

السلام عليكم
ماأدري أشكرك لو أعاتبك على الموضوع قائد بغداد
بس تدلل نجاوب على الأسئلة
1-شنو شعورك اول ماخرجت من العراق
أني طلعت من العراق بعد يومين من زواجي ،يعني ماأعرف شلون أوصفلك شعوري بوكتهة مثل اللي مضيع ،واحد وشلعوا من الجذر وكلولة سويلك جذر بكاع جديدة
شي كلش صعب تترك كل اللي تربيت وكبرت وتعلمت عليه وتروح لشي جديد من كل النواحي
بس اللي مهون علية بوكتهة ولحد الآن وجود أبو فاطمة
(المرأة لمن تتزوج زوجهة يصير أمانهة وأهلهة ووطنهة )
2-اول موصلت للبلد الجديد اشكان شعورك
شعور متضارب ما بين شوق حنين للي تركتة ومابين ترقب لمعرفة الجديد اللي منتظرني
3-بعد ما تغربت شنو رأيك بلغربه
ماأكذب عليك وأكولك الغربة كلهة عذاب ،رغم كل اللي متوفرلي بس أفتقد كثير أشياء (الزيارات وحضور المجالس،لمة الأهل،الحنية وطيبة الطبع) شوف أحنة جيل وعينة على العراق بأسوأ حالاته ماشفنة من خير العراق اللي شافوه أهلنة بس مرتبطين بيه ونحن ألة ومعجونين بترابة ، بس الغربة علمتني ووفرتلي الأمان والأستقرار اللي كنت أتمناه بالعراق
4-تتمنى ترجع للعراق
أصعب سؤال يمر علية هذا السؤال ، أتمنى أرجع للعراق لمن يرجع العراق عراقنة ، الصراحة ماأتمنى طفلتي تعيش بالعراق وتكرهة ، اللي ديصير بالعراق هسة من حالات غريبة ومو طبيعية ولا عقلانية وأبداً مو عراقية ،أتمنى أرجع للعراق وأعيش بيه بدون ماأتغرب بيه
5- شنو اول منطقه اتحب اتروحلها من ترجع
كربلاء أكيد (أزور أبا عبد الله عليه السلام وبعدين أزور أبا الفضل سلام الله عليه) وأول بيت أدخلة بعد الزيارة بيت خالي أبو أمير بيت اللمة الحلوة والحنية
6-اريد كم كلمه تعبر شعورك بلغربه
الغربة أبد مو غربة مكان الغربة الصدك غربة الناس بين الناس ، يعني اللي ديصير بالعراق هسة غريب عن العراق (يعني العراق هسة صار غريب عن العراق)ماأعرف أفتهمت قصدي لو لا
7-اريد دعاء للعراق
يارب أحمي بلدي من كل دخيل قاصد أذيتة ورجع للعراق مكانتة اللي يستحقهة وأن شاء الله يابلدي ترجع تنور بأهلك ويتنورون بيك وأشوفك عالي بصيتك وترجع بلاد الخير والحضارات
ومهما دورت ماألكي بطيبة أرضك،سامحني على فراكك بس أبد ماناكرة الطيب والأصالة اللي بيك

[قائد بغداد]

شكرا ام فاطمه ما قصرتي وتحياتي الج واسف
اذا قلبت المواجع

[ابوهاشم]

اخي وحبيبي حسان البطل
قائد بغداد وبامتياز
اولا الموضوع تستاهل التحية فوق التحية المعتادة لهذا الموضوع
وثانيا الاسئلة تقلب المواجع ولكنها مرتبه
ثالثا اليك الاجابات :
1-شنو شعورك اول مخرجت من العراق؟
كيف تتوقع شعور من ترك اخيه شهيدا بدون دفن ووالده جريحا وامه لم تتكلم بكلمة عند الوداع ولو نسيت كل شيء لاانسى تلالأ عينيها مودعة بالحسرة واضعة يدها على خاصرتها وكانها تقول (وين رباي )
2-اول موصلت للبلد الجديد اشكان شعورك؟
وصلت اولا للسعودية وكان شعوري باني اطلب لجوءا عند من لايرحمني ثم خرجت الى امريكا وكل لحظة تمر علي تشعل صدري شوقا للعراق
3-بعد ما تغربت شنو رائيك بلغربه؟
ان من اقسى العذابات ان تتغرب بعيدا عن وطنك
4-تتمنى ترجع للعراق؟
اذا مت بعيدا عن العراق يعني مت حسرة على ارض وطني
5- شنو اول منطقه اتحب اتروحلها من ترجع؟
ازور النجف ثم كربلاء في يوم واحد وارجع للنجف واتمنى ان اموت عند اعتاب امير المؤمنين عليه السلام ويسحقني زواره
6-اريد كم كلمه تعبر شعورك بالغربه؟
ان الغربة ديدن الانبياء والاوصياء والاحرار عليهم السلام
واظن ان الله جعلهم قدوة ليصبر من تغرب عن وطنه
واكثر ما يصبرني الحديث (طوبى للغرباء ) واروع مااقوله لوطني هذه الالام بسببك لاني لم احب ان اراك ذليلا ولم ارض ان اسالم الطغاة
7-اريد دعاء للعراق
اللهم اجعل العراق بلدا آمنا وارزق اهله الامن والامان والرزق الوفير
وسلم قائد وجميع الاسود

[قائد بغداد]

شكرا اخي ومولاي العزيز ابو هاشم
الله خليك ونولك الي بالك بحق محمد والي محمد
تحياتي الك واشكرك على الدعاء
اخوك
قائد بغداد

[sniper 3raq]

1-شنو شعورك اول مخرجت من العراق
حقيقة ما اذكر كنت صغيرة ! بس دمعتي ما تفارقني
2-اول موصلت للبلد الجديد اشكان شعورك
غريب كأني تائهة
3-بعد ما تغربت شنو رائيك بلغربه
لا تعليق ..
4-تتمنى ترجع للعراق
اكيد لا مجال للمناقشة بس يعني العراق يرجع النا ؟
5- شنو اول منطقه اتحب اتروحلها من ترجع
ادوره كله هاي امنيتي
6-اريد كم كلمه تعبر شعورك بلغربه
كـتــلـنـه الـشــــوك يـادنـيــــا لـوطنــــه عــــــراق ومـانـبـدلـه بالـــف جنـــــــهـ



7-اريد دعاء للعراق
اللهم اجعل العراق بلدا آمنا
و ابعد ايدي الضالمين عنه
و احفظه يا رب
..........................
حياتي قائد تسلم موضوع اكثر من رائع
تحياتي صديقتكم
sniper 3raq

[قائد بغداد]

4-تتمنى ترجع للعراق
اكيد لا مجال للمناقشة بس يعني العراق يرجع النا ؟
..........................
حياتي قائد تسلم موضوع اكثر من رائع
تحياتي صديقتكم

sniper 3raq

شكرا اختي على ردك بس اريد اكلج تره العراق بيد اهله وثقي اي دوله انتي بيه بالعالم العراق هسه اامن منه ولتباوعين على التلفزيون تره كوله جذب واذا انتي قصدج غير شي بالعراق يرجعلنه بعد يمج

وانتي سالمه حياتي منوره الاسئلة وكل الهلا بيج وبطلتج الحلوه
تحياتي

[ام فاطمة الزهراء]

السلام عليكم
انا من الجزائر لكن حبيت اشاركم في الموضوع كوني اعيش في الغربة عدرا لصاحب الموضوع على تعديل بعض الكلمات


1-شنو شعورك اول مخرجت من الجزائر
الجسد في فرنسا والعقل في جزائري الحبيبة
2-اول موصلت للبلد الجديد اشكان شعورك
كان علي ارجع للجزائر فورا
3-بعد ما تغربت شنو رائيك بلغربه
انا جديدة في الغربة الوقت امامي طويل
4-تتمنى ترجع للجزائر
اكيد
5- شنو اول منطقه اتحب اتروحلها من ترجع
مسقط راسي تيهرت
6-اريد كم كلمه تعبر شعورك بلغربه
بلادي وان جارت عليا عزيزة واهلي وان كانو عليا كرام
7-اريد دعاء للجزائر
ربي ينصر بلادنا ويا رب يسود الامن وتصير الجزائر متل ما كانت في الاول.
اعتدر مرة اخرى لتعديل الكلمات وشكرا على الموضوع

[قائد بغداد]

شكرا اختي نصره على المرور ويارب اترجعين للجزائر سالمه غانمه تحياتي الج

[ام فاطمة الزهراء]

شكرا اختي نصره على المرور ويارب اترجعين للجزائر سالمه غانمه تحياتي الج
الله يخليك واتمنى رجوع كل مغترب عن وطنه
مشكور تحياتي لك

[قائد بغداد]

شكرا اختي على دعائج والله وفقج تحياتي الج