قصيدة .. عشق العراق

[سلام الخطاط]

قصيدة عشق العراق



تالي وياك يا نبض القلب ياعراق سالفتك صفت للقلب سالفته



تالي وياك يا ارض الفرات و دجلة و التاريخ ابتليت ابلوة من عطشان و ميك شربته ؟؟



ابتليت ابلوة من اول ما فتحت العين و شفت اسمك على الكاروك سجلته ؟



......................



بجيت اول دمع ثاريني مو جوعان ثاريني عارف تنغدر سكته



و ثاريني عارف من يجيك البين و جروحك تزيد إعلى اليون ونته



وجت امي التريد اترضع الجوعان ما تدري بحليبي المنك شربته



شبعان .. يا يمة .. الحليب و ابجي مو جوعان ابجي إعلى يوم الرحت وترابك اتركته



.......................



حبيت اول حبوتي بدرب من بغداد و توجيت إعلى زودك لمن للمشي عرفته



قريت اول نشيد اليحجي عنك جان و رفعت اول علم بهواك رفرفته



التكيت اول صديق و من لعبت وياه لعبنا جنود كلمن شايل اتفكته



نحامي بصبحك و ما نتعب الا بليل نخاف يجيك واوي وياه ابن عمته



غرزت الغيرة بينا من الصغر يا عراق واحدنا العراقي ويا وسع بخته



ياهو الضنكته الدنيا و لواه البين دور عالعراقي .. بعونه و بخته



لكى العونة و لكى رجال التذوب صخور و لكى الماله مثيل بطيبه و مروته



.......................



و كبرنا و ما صغر بيتك يا بيت الطيب بيت العامر .. الدلالة بنخلته



خيمة و ظللت بالحب علينا اعوام ننام الرغد و انت النوم معرفته



نكابر من نشيل الهدمة ونركب الباصات تالي هناك نعرف .. انت الوطن بس انت



ندور مرهم اليرهم على المجروح ثاري الجرح بس انت الي طببته



ندمانين على عمر انكضى بلياك دخيلك يا وطن .. بلكي الضاع لملمته



بلكي اتجمع شتات الغصب عافوك و تريح رذيل العمر .. و الطفل كبرته



بلكي و تجبر بخاطرنا و نرد للبيت و يرد بينا النفس .. المنك بدت شمته



غايب عالكلب كالوا هاليبعد على العين سنين انت ابعدت و بعدك للكلب دكته



تالي وياك .. كل ما نبعد تزيد المحبة وياك جن رب الجلالة خلقك و اسس بيك جنته

[صخـَـبُ أنـثــَى]

صح لسانك اخوي الكريم سلام الخياط
وتسلم ع هذه القصيدة الرائعة بحق الحبيب الذي لا تنمحي
محبته من قلوبنا ( العراق العظيم )

ولا يفوتني فرصة الترحيب بك في منتديات اسود العراق
حياك الله بين اهلك وناسك ..

أرق التحايــا http://img91.imageshack.us/img91/4344/zr300hw8.gif

[¤( عشتار )¤]

شكرا على القصيده الرائعه

عاشت ايدك

[سلام الخطاط]

الشكر موصول لكم يا ورود ..

تحياتي